LEGAZPI CITY — Halo-halong emosyon na suboot an namamatean ngonian kan bilog na pamilya Rollo sa pig-aabangang pagluwas kan deliberation result kan Ireland’s Got Talent sa maabot na Sabado, Marso 17 na magdidikta kun makakalaog an 13-year old Pinay singer na si Shaniah na enot nang nagtrending sa audition.
Sa intrevista kan Bombo Radyo Legazpi ki Joy Rollo, ina ni Shaniah, ipigheras kaini na todo na suboot an pangadye kan pamilya kasabay kan kurab sa kakaluwasan kan pagbale sa kompetisyon.
Katakod kaini, inimbitaran man ni Joy an mga amigong Irish asin mga kahimanwang nag-iistar sa Ireland sa pagdalan kan kaabang-abang na deliberasyon bandang alas-7:30 ng gabi, oras sa nasabing nasyon mantang hagad man an suporta asin pangadye sa mga kahimanwa sa Pilipinas huli ta solamenteng an mga nag-iistar sana sa Ireland an pwedeng magboto sa kompetisyon.
En kaso man na magpositibo an resulta, dagos-dagos na an journey ni Shaniah sa semi-finals live show sa March 21 asin March 24 man an finals.
Mientras tanto, segun pa sa ina kan singer na dawa pa dae man makalaog sa mismong semi-finals si Shaniah, maogma na suboot an pamilya na dakol an naka-appreciate sa talento kan aki.
