LEGAZPI CITY – Nagpapadagos ngunyan an ipigsasagibong pag-proseso asin pag-examine kan mga kapulisan sa mga narekober na ebidensya sa pinangyarihan kan pananambang sa duwang police mobile kan Provincial Public Safety Company (PPSC) sa Labo, Camarines Norte.
Sa intrevista kan Bombo Radyo Legazpi ki PSupt Ricky Camisola, Chief of Police kan Labo-PNP, kinumpirmar kaini na walo an nalugadan sa pananambang kan mga pinagtutubudan na New People’s Army (NPA) mantang saro an kumpirmadong gadan.
Nabisto an nagadan na si PO2 Richard M. Abad asin an mga lugadan na sinda PO2 Ronald Gutierrez; PO2 Ericson De Vera; PO1 Jeffrey Tarrobago; PO1 Peter Valero; PO1 Romar Umandap; PO1 Johnson España, PO1 Mark Anthony Aguilar; asin PO2 Rommel Orante.
Segun sa opisyal, hali an mga ini sa Barangay Bagong Silang asin pasiring kuta sa Daet Camarines Norte.
Tulos man suboot na dinara sa ospital an nasambitan na mga biktima ngani na matawan nin medikal na tratamento.
Alagad paglilinaw ni Camisola, bako pa sierto kun talagang mga miyembro kan NPA an mga armadong kalalakihan na may tagibo kan nasambitan na pananambang.
