LEGAZPI CITY — Kinumpirmar kan Tabaco City Police an nangyaring pagkagadan kan sarong preso sa laog mismo kan karsel kan Bureau of Jail Management and Penology (BJMP) Tabaco.
Segun ki P/Supt. Jefferson Araojo, hepe kan Tabaco Police, naikarsel pa sana an biktima na si Marianito Abas bandang alas tres kasuodma nin hapon makalihis na madakop kan Malinao Municipal Police, Albay Police Intelligence Branch asin Albay Police Provincial Office.
Si Abas an nahahampang sa walong kaso kasabay na an incest rape, rape by sexual assasult asin pagbalgar sa section 5 kan Republic Act 7610 o Anti-Child Abuse Law.
Segun ki Araojo, nagadan si Abas makalihis na pagbubungagon kan kapwa preso na sinda Glendo Cervantes, Domingo Loncero, Fernando Tarasmo asin Jinggoy Bombales.
Naidara pa ini sa Ziga District Hospital sa ciudad alagad idineklarar ng dead on arrival.
Si Abas an ipigkokonsiderar na number 1 most wanted person sa Malinao.
Sa ngonian, nagpapadagos pa an parallel investigation kan BJMP asin Tabaco Police sa nasabing insidente.
