LEGAZPI CITY – Ipinag-orgulyo kan Disaster Risk Reduction Management Division sa Legazpi na saro an syudad sa mga marepresenta sa sarong international na kompetisyon.
Sa intrevista kan Bombo radyo Legazpi ki Eng. Miladee Azur, over all incharge kan CDRRMD, nakalaog an entry kan syudad na Balangay Project sa Global Best Climate Practices na pagalabanan kan manlaen laen na nasyon.
Napag-araman na sa laog kan 188 na mga bnagralaban na entries, an syudad an saro sa mga nakabali sa 19 na kumpirmadong kabale sa nasambitan na kompetisyon.
Huli digdi, an Balangay Project an magigin panlaban kan Pilipinas asin posibleng maadaptar kan bilog na kinaban kun enkaso man na manggana.
An proyektong ini an sarong sarong cloud base information system para sa mga kalamidad na nagmamawot na makapagpalakop nin mga impormasyon dapit sa mga nangyayari asin mangyayaring mga kalamidad.
Dugang pa ni Azul na an Balangay Project an sarong application na magigin dalan ngani na makapagpalakop nin warning, alert asin precautionary measures sa gabos na mga namamanwa.
Kaibanan sa tulong pilot barangays an Barangay Oro Site, Banagay Puro asin Dapdap kun sain dakol na man suboot an nag-download kaini.
Mientrastanto, siniyerto kan lokalbna gobyerno kan syudad kan Legazpi na padagos sidang maisip nin creative na mga paagi ngani na mamantenir an zero casualty kada pigtatamaan nin kalamidad an probinsya.
