LEGAZPI CITY- Nagtitios na mga ciudadano an direktang maapektaran kun en kaso makalusot sa Kongreso an ipigbubusol na proponidong ley ni Masbate Rep. Scott Davies Lañete na nagmamawot na patawan nin excise tax an mga processed products na igwang asin.
Ini an nagin bweltada ni Bayan Muna Rep. Carlos Zarate katakod kan House Bill 3179 na isinangat ni Lañete.
Nakapalaman sa nasabing bill an kamawotan na mag-imposar nin P1 excise tax sa kada milligram kan sodium na sobra sa one-third kan allowable daily intake kan asin na segun sa Department of Health.
Inapod pa kaining anti-poor an nasabing Sa ibong na lado, salud an mayor na rason kan nasabing bill katakod naman kan pagiging doktor ni Lañete kun saen tinawang-duon kaini an nakakaag sa 1987 Philippine Constitution na obhetong protehiran an direchos sa marhay na salud asin ipaisi an health consciousness.
Segun kaya ki Lañete, nakaka-kontribuer an nasabing ley sa increased risk kan mga nakakagadan na helang asin ipinaotob naman sa mga nacion kan Vietnam, Uganda, Tanzania, Suriname, Sri Lanka, Panama, Morocco, Kenya, asin Jordan.
Pighihiling kaining makakatabang sa mga ciudadano an pagpataw nin buwis sa produksyon, pagpapabakal asin pagkonsumo kan food products na asin an sangkap tangarig na makaibitar sa pagkonsumo kaini na sobra mientras na makakaguno pa nin dugang na pondo para sa gobyerno.
