LEGAZPI CITY — Narekober na kan mga personahes kan San Jose Del Monte City Police sa provincia kan Bulacan an nawawarang kotse hale sa sarong talyer sa Alternate Road sa ciudad kan Legazpi.
Kan nakaaging bulan pa, Mayo 30 kan enot na mairehistro na nawawara an nasabing behikulo na pagsadiri ni Edmundo Magdaraog na na ipinairahay sana sa nasabing talyer.
Nadiskubre kan pamangkin kan kagsadiri na si Chris Llarena asin mekaniko kan shop na si Oniell Repato na nawawara an nasabing kotse kasabay kan pagkawara man kan bagong tagapinta kan shop na binistong si alyas Eric.
Nagpa-aram kaya an suspek sa tagsadiring si Sammy Penilla na duman muna magpapaaga sa talyer alagad hudyan kan mapag-araman na pwersahang binuksan kaini an bintana kan kwarto kan amo asin kinua an susi kan lunadan na pigtutubudang hinabas kaini.
Sa ngonian, base sa nagunong impormasyon kan Bombo Radyo Legazpi, nasa kustodiya na kan Bulacan Police Provincial Office an inabandonang kotse mientras na nakipagkoordinar naman sa Legazpi PNP tangarig madakop na an pighahanap pang suspek.
