LEGAZPI CITY- Nagtetenir pa sa Bicol Regional Training and Teaching Hospital hasta sa ngonian an sarong pamilya makalihis na makamate nin sintomas nin pagkahudong na enot na pinagtubudan na huli sa kinaon na antak.
Tolo sa limang aki kan pamilya Belchez na residente kan Sitio Dalugdog, Brgy. Manaba sa ciudad kan Ligao an idinalagan sa ospital sa laog sana nin sarong aldaw makalihis na magreklamo nin pangungulog nin tulak, pagtatae asin pagsusuka.
Sa intrevista kan Bombo Radyo Legazpi sa tiyuon kan mga aki na si Jojit Floranza, napag-araman na nag-50 50 pa an buhay kan mga ini alagad saro an dae na nakasalbar asin binawian nin buhay.
Miyerkoles pa kan mangyari an nasambit na insidente asin makalihis an duwang aldaw kan makamate man nin kaparehong sintomas an mga magurang kan mga ini kaya idinalagan man sa ospital na ipinagkokonektar sa maating tubig na nainom sa poso na pigkukuhanan kan mga ini.
Apwera sa nasambit na pamilya, nakamate man kan parehong sintomas an iba pang pagtaraid na harong sa lugar na nagkukua man sa kaparehong poso nin pangkonsumong tubig sa aro-aldaw.
Mientras tanto, nagpasiring naman sa lugar an mga personahes gikan sa Departamento de Salud (DOH) tangarig na magkua nin sample kan tubig asin magpatanid sa mga residente.
Sa presente, nagbabakal nguna sa mga refilling station an mga ini para sa inumong tubig.
