LEGAZPI CITY- Dae pa nabibisto sagkod ngunyan an bangkay kan sarong lalaki na nadukayan sa Barangay Marayag Libon, Albay.
Magigirumduman na may mga tama ini nin bala sa daghan asin sa tagiliran kan mahiling sa uma na boundary na kan Libon asin Polangui.
Nagtutubod si PCI Edgare Azotea, hepe kan Libon Municipal Police Station, na hinulog an bangkay sa nasambitan na lugar bandang alas 3:00 nin hapon kun sain diit sana an nag-aaraging behikulo sa banwaan.
Dakula man suboot an tsansa na bako ini residente kan Libon.
Insigida makalihis na madukayan an nasambitan na bangkay, nagpa-Flash Alarm an pulisya sa gabos na banwaan sa Albay alagad sigon ki PCI Azotea, dae pa nin nagki-claim sa biktima.
Naimbalsamar na man suboot ini asin pighahalat na sanang may mag-dulok na kaparientes.
Nangangapodan si Azotea sa mga nakakabisto sa lalaki na nakapost na an ladawan sa saindang Facebook page.
