LEGAZPI CITY- Nagpaabot nin apela si RTC Executive Judge Lelu P. Contreras kan Catanduanes sa Technical Education and Skills Development Authority (TESDA) na magtao nin manlaen-laen na skills training sa mga preso siring man sa mga convicts na nasa irarom kan Parole Probation.
Sinabi kan hwes na maikokonsidirar na sarong divine intervention an saiyang pag-atindir sa ground breaking ceremony para sa expansion kan TESDA Provincial Office sa probinsya.
Dugang pa kaini, sinamantala nya na an tsansa sa paagi kan paghagad ki Elpidio Tuboro, Officer-In-Charge kan TESDA Catanduanes na mag-opresir nin serbisyo sa mga preso.
Ineksplikar ni Judge Contreras na dakulang bagay para sa mga preso an pagkakaigwa nin skills training ngani na urog na magin produktibo an lambang aldaw sa kulungan asin ngani na maibitaran an pagkapu’ngaw.
Marhay suboot ining preparasyon in kaso maabswelto sinda asin magkaigwa nin tsansang makapagbagong-buhay.
Sa ibong na lado, naogma man an bagong tukaw na hepe kan Parole and Probation Office na si Luvisminda Codia kun sain sinabi kaini na sarong dakulang prebelihiyo na an huwes na mismo an naghiro ngani na matabangan an saindang mga kliyente.
