Legazpi City – Nasakote kan mga otoridad an duwang lalaki sa isinagibong interdiction operation na pinanginutan kan Philippine Drug Enforcement Agency (PDEA) Sorsogon Provincial Office asin iba pang mga ahensya sa Matnog Port Compound, Matnog, Sorsogon alas 10 nin banggi.
Sa impormasyon na nakalap kan Bombo Radyo Legazpi gikan sa PDEA Bicol, binisto an mga naarestar na suspetsado na sina Kabilan Arsad asin Tato Jehamin na parehong residente kan Shariff Aguak, Maguindanao asin pigtutubudang mga courier.
Sa nasambit na operasyon sa pakikipagtabangan kan nagkapirang unit, nakua sa mga suspetsado an poco mas o menos 18 kilo nin pigtutubudang shabu asin nagkakantidad nin 90 Million Pesos.
An nasambit na mga suspetsado, nahahampang sa kasong pagbalgar sa Acta Republica numerado 9165 o an Comprehensive Dangerous Drugs Act of 2002 asin nasa kustodiya na kan mga otoridad para sa magkakanigong disposisyon.
