LEGAZPI CITY- Walong mga indibidwal an nairido makalihis an nangyaring banggan nin truck asin pick up na ikinadamay pa nin sarong tricycle sa Barangay Agos sa banwaan kan Polangui, Albay.
Segun ki Polangui Emergency Quick Response Team Christropher Encisa sa intrevista kan Bombo Radyo Legazpi na saro sa mga pasyente na lunad kan pick up an nagsapar nin malalang mga injuries.
Pig-oobserbaran man an sitwasyon kan nasabing pasyente na pigbubulong sa ospital.
Basado sa inisyal na imbestigasyon, an pick up suboot an bahagyang nakalaog sa linya kan kasabatan na truck alagad padagos pang pig-aaram an bilog na detalyes.
Napag-araman na an pick up an pasiring sa Cotabato kan mangyari an insidente.
Aminado an opisyal na bako pa malinaw sa ngunyan kun siisay an may kasalan sa nangyaring aksidente huli ta nagpapadagos pa an imbestigsayon.
Mientras tanto, nagpagirumdom man si Encisa sa publiko na ugalion na i-check an sitwasyon kan saindang mga behikulo asin dae magpirit magmaneho kun dae na kaya ngani na maibitaran an kaparehong mga aksidente.
