LEGAZPI CITY – Nagbyahe na pasiring sa Ilocos Norte an 720 na mga delegado kan rehiyon Bicol para sa nagdadangadang na Palarong Pambansa 2025.
Segun ki Department of Education Legazpi City Division Sports Officer Dexter Sison sa intrevista kan Bombo Radyo Legazpi na nagpoon na an byahe kan first batch kan mga Bicolano athletes pasiring sa Laoag, Ilocos Norte alas-5 nin hapon kasuhapon asin suminunod an second batch bandang alas-9 nin banggi kasuhapon.
May nakatalaan pang magbyahe suboot taodtaod na hapon nganing makompleto an mga representante kan rehiyon Bicol sa national meet asin kompwesto an gabos na mga byahe nin tig-180 na mga delegado.
Sa presente an matiwasay asin matuninong an pagbyahe kan enot na batch kun kaya piglalaoman ninda na warang mangyaring untoward incident sa enterong durasyon kan saindang byahe.
Pigtaram pa kan opisyal na an mga nasa first batch an mga parakawat para sa team sports asin masunod an mga representante kan rehiyon para sa dual asin individual sports.
Tulos man sindang magsasagibo nin familiarization sa mga playing venues sa oras na mag-abot na an enterong delegasyon asin magpapadagos ini hasta magpoon na an nasabing pakawat.
Nagpapasalamat man si Sison sa mga magurang kan mga atleta huli sa saindang itinaong suporta sa saindang mga aki nganing mairepresenta an rehiyon sa nagdadangadang na Palarong Pambansa asin nangangapodan nin pangadyi para sa kaligtasan kan gabos na delegasyon kan rehiyon Bicol.
