LEGAZPI CITY – Dae na nagibong maisalbar sa ospital an sarong 71-anyos na lolo makalihis na mabagsakan nin dakulang gapo sa Brgy. Lidong, Sto. Domingo, Albay.
Binisto ining si Melchor Balderama na residente man kan nasabing banwaan.
Sa ekslusibong intrevista kan Bombo Radyo Legazpi ki PCapt. Genevieve Oserin, hepe kan Sto. Domingo PNP, nagpasiring sa quarry site an lolo kaibanan an saro pang amigo tangarig na magkua nin graba asin basud.
Alagad labing pagkabigla kan mga ini kan biglang magrasay an sarong dakulang gapo asin mabagsakan sa itaas na parte kan lawas si Balderama.
Napag-araman na nasa 8 hasta 10 metro an langkaw kan pigkukuhaan nin baybay asin graba kan mga ini.
Naghagad man nin tabang sa pulisya an kaibanan kaini urog na warang gustong magtabang sa takot na sinda man an marasayan.
Segun pa sa hepe, padificilan man magin an pagkua kan lalaki sa irarom kan gapo kaya kinaipuhan pa an dakol na rescuer asin pulis tangarig na maalsa ini.
Idinalagan sa ospital an lalaki alagad ipigdeklarar nang dead on arrival kan doktor.
Nagpagirumdom man an opisyal nin labing pag-iingat kun nagku-quarry urog na sa mga small-time.
