LEGAZPI CITY – Naghahanda na an Schools Division Office kan Albay para sa dagsa na naman nin mga enrollees ngunyan na nagbabalik na an klase.
Segun kay Froilan Tena an tagapagtaram kan Schools Division Office kan Albay, maabot sa 100,000 na mga estudyante an magpapa-enroll ngunyan na school year sa provincia nin Albay kung kaya dakol an kaipohan na asikasohon kan ahensya.
Pangapudan kan opisyal sa mga magurang na sa pagbubukas kan enrollment sa aga, Hulyo 3, tulos ng ipaenroll an saindang mga aki asin dae na maghalat pa kan deadline sa petsa 23.
Madali naman ngunyan an proseso kan pagpapa-enroll huli ta otomatiko na an enrollment sa mga Kindergarten hasta Grade 11.
Nagkakaigwa man nin school-to-school enrollment para sa mga estudyanteng matransfer pasiring sa ibang eskwelahan.
Naglalaom an ahensya na magiging matrayumpo an pagbubukas nin klase ngunyan na school year asin mas dakol an mauukodan kan mga estudyante.
