LEGAZPI CITY — Pigbubulong na ngunyan sa ospital an sarong 5-anyos na aking lalaki makalihis na mabangga nin sarong kotse sa Barangay Bulusan, banwaan kan Libon, Albay.
Susog sa impormasyon na ipinaabot kan Libon Municipal Police, nabisto an nakabanggang drayber na si Joel Codilana, 34-anyos na residente kan Barangay Rawis sa parehong banwaan.
Nagluluwas sa imbestigasyon kan pulisya na pauli na si Codilana sa saiyang harong lunad kan saiyang kotse kan aksidenteng mabangga an aki na solong nagbabalyo sa tinampo.
Nagsapar nin mga lugad an biktima na tulos man na idinalagan sa pinakaharaning ospital sa Libon alagad ibinalyo sa Bicol Regional Teaching and Training Hospital (BRTTH.)
Boluntad man na nagsurindir si Codilana sa mga otoridad makalihis an insidente.
Sa ngunyan, padagos pa ining pig-iimbestigaran kan pulisya.
