LEGAZPI CITY- Wara pa nin patod an pagpapa-evacuar sa mga residente sa risky areas siring kan sa Libon, Albay dawa pormal nang hinale kan PAGASA an mga isinakat na tropical cyclone warning signal sa bagyong Usman na ngonian an saro na sanang ganap na Low Pressure Area (LPA).
Paliwanag ni Libon Disaster Risk Reduction and Management Office (MDRRMO) head Ian Secillano sa intrevista kan Bombo Radyo Legazpi, piglalaoman pa suboot an dagos-dagos na paglangkaw kan tubig sa nagkapirang lugar urog na sa mga barangay na harani sa salog.
Napag-araman na regular na kun bahaon an nasabing banwaan en kaso magkusog an mga pag-uran urog na nagsisirbeng “catch basin” kan Albay kun sain nagbubulos an mga tubig na hale sa tercer distrito kan provincia.
Sa katunayan pa suboot, na-isolate an 40 pamilya sa Brgy. Zone 7 kan banwaan makalihis na mag-abot nin hasta sa liog an langkaw kan tubig-baha kaya nagpasaklolo na sa darakulang truck kan AFP tangarig na mailipat an mga ini sa mga salbadong lugar.
Afuera sa nasabing barangay, baha na man sa Sta. Cruz, Bulosan, Brgy. Zone 1, Bululo asin nagkapira pang lugar na harani sa poblacion area.
