LEGAZPI CITY – Nagpapadagos an pagpapagibo kan Department of Public Works and Highways nin mga flood control projects sa rehiyon Bicol ngonian na taon.
Segun ki DPWH Bicol spokesperson Lucy Castañeda sa intrevista kan Bombo Radyo Legazpi na uminabot na sa kabilugang 357 flood control projects para sa rehiyon ngonian na taon kun sain 23 pa sana an natatapos, 169 na presenteng pigsasagibo, asin 142 na dae pa napupunan.
Kun susumahon suboot an nasa 30 percent pa sana an natatapos ngonian na taon asin pighahalat pa an pondo para sa mga dae pa napunan na mga proyekto.
Afuera sa pondo an nagkaka-eksperyensya man sinda nin delay urog na kun maraot an panahon partikular na an epekto kan habagat asin magkakasunod na bagyo na nagdara nin mga pag-uuran sa rehiyon.
Pigtaram pa kan opisyal na afuera sa mga major projects sa provincia kan Sorsogon an irigwa man sa ciudad kan Legazpi arug kan pigpapatugdok na cruise ship terminal asin sa mga provincia kan Masbate, asin Camarines Sur.
Sa mga natapos suboot na mga proyekto an mga standard asin de-kalidad an mga kagamitan asin materyales na ginamit huli ta pwedesir mapanimbag an mga contractor na mabayolar sa saindang kasuguan.
Pagdoon niya man na pigsusunod ninda an anuman na kasuguan kan gobierno arug na sana kan pagsairarom kan mga papeles kan mga bidders sa bid and awards committe kan saindang ahensya nganing masala kun siisay an dapat magkapot kan saindang proyekto na pigpapagibo.
Pangapodan ni Castañeda sa publiko an disiplina sa pagtatapok kan basura huli ta basado sa saindang monitoring an nadiskubre nindang mga baradong basura an numero unong rason kan pagbabaha sa nagkapirang parte kan rehiyon.
