LEGAZPI CITY – Nasakote kan mga personahes kan Philippine Drug Enforcement Agency Albay Provincial Office an sarong drug den sa Brgy. San Roque, Daraga, Albay.
Segun ki Philippine Drug Enforcement Agency Albay Provincial Director Noe Briguel sa intrevista kan Bombo Radyo Legazpi na naisakatupadan an operasyon sa pakikipagtabangan kan Daraga Municipal Police Station asin Regional Maritime Unit 5 Regional Special Operations Teams makalihis an pirang semanang case build base sa report kan mga residente asin opisyales kan barangay.
Dakop sa isinagibong operasyon si alyas “Ando,” 57 anyos na kagsadiri kan harong na nagserbing drug den asin an duwang parokyano kaini na binistong 32 anyos asin 35 anyos na mga persona na residente kan kaparehong banwaan.
Nakumpiskar man an mga heat-sealed plastic sachets na naglalaog nin pigtutubudang shabu asin an mga drug paraphernalia asin iba pa na piggagamit sa saindang pot session.
Mawot man kan opisyal na i-adapt kan mga gobierno lokal an saindang resolution na nagsasabing kada may raid an mga law enforcement agencies an dapat hale sa ibang barangay an magin testigo nganing malikayan an salang mga testimonya asin pati na man sa saindang kaligtasan.
Nagtutubod man siya na dae man dapat i-deny kan mga Local Government Unit an saindang resolusyon huli ta dakulang bagay ini para sa saindang nasasakupan asin sa mga karera kan mga nagtitindog na testigo sa saindang mga operasyon.
Pagdoon man ni Briguel dakulaon na implekasyon kan pagkakadakop sa mga suspetsado huli ta mismong mga residente an nauugma sa pagkaka-dismantle kan mga drug den para sa saindang kaligtasan kan saindang pamilya sa palibot kan mga drug den.
