LEGAZPI CITY – Karsel an bagsak kan tulong indibidwal makalihis madakop sa isinagibong buy bust operation na nagresulta man sa pagkaka buwag kan sarong drug den sa Purok 2 Puting daga, Barangay Cabagñan west, Legazpi City.
Segun ki Legazpi City Police Station Public Information Officer Police Executive Master Sergeant Carlos Paña sa intrevista kan Bombo Radyo Legazpi na nakabakal an saindang poseur buyer nin 0.5 gramos nin droga na pigtutubudang shabu na may street value na poco mas o menos P8,000 sa mga suspetsadong binisto na sinda alyas “dencio” asin alyas “jason”.
Naaktuhan man ninda na naggagamit kan naunambitang droga si alyas “Dayot” kan isagibo ninda an operasyon kun kaya sinabay ini sa pag-arestar kan saindang mga personahes.
Paliwanag niya man na an nilusob na harong na nakompirma nindang piggigibong lugar para pot session kan mga naggagaramit kan ilegal na kontrabando an kagsadiri ni alyas “dencio” makalihis man an naguno nindang impormasyon.
Pigtaram pa kan opisyal na si dencio an nasa listahan kan mga pigkokonsiderang street level individual mantang mga newly identified individual man o naagda sana an duwa pang indibidwal na naarestar.
Piglalaoman niya na huli sa matrayumpong operasyon an masusunod na ninda an iba pang pag-iriba kan mga suspetsado sa paggamit nin ilegal na droga.
Pighayag man ni Paña na may mga barangay na sa ciudad an naideklara nang drug cleared barangay asin padagos an saindang paghingoa nganing maideklara man an Legazpi City bilang drug cleared Cities sa rehiyon Bikol.
Sa presente mahahampang an mga suspetsado sa pagbayolar sa Republic Act No. 9165 o an Comprehensive Dangerous Drugs Act of 2002 asin nasa kostudiya na sinda Legazpi City Police Station para sa magkakanigong disposisyon.
