LEGAZPI CITY—Timbog an sarong lalaki sa ikinundusir na anti-illegal drugs buy-bust operation kan mga otoridad sa Purok 4, Barangay Tagas, Daraga, Albay.
Binisto an suspek na si alyas “Taroroy”, 23-anyos, may live-in partner, sarong mechanic, asin residente kan Purok 4, Barangay Bagacay, Legazpi City.
Naarestar an suspek sa pinagsarong operatiba kan Daraga Municipal Police Station, Philippine Drug Enforcement Agency Albay Provincial Office, asin Philippine Drug Enforcement Agency Regional Office 5.
Nakumpiskar sa suspek an sarong heat sealed transparent plastic sachet na may laog na pigtutubudang shabu na may gabat na 1.0 gramo asin estimated market value na P6,800.
Sa paagi kan search incidental to lawful arrest nakumpiskar man sa suspek an tulong heat-sealed transparent plastic sachets na may laog na pigtutubudang shabu na may gabat na 15 gramos asin nagkakantidad nin P102,000; sarong P500 genuine bill; asin duwang P500 bills na boodle money.
Nasa kustodiya kan Daraga MPS an suspek asin mahahampang sa kasong pagbalgar sa Sections 5 and 11 sa irarom kan Article II kan Republic Act 9165 o Comprehensive Dangerous Drugs Act of 2002.
