LEGAZPI CITY-Arestado asin nasa kustodiya na kan Philippine National Police (PNP) an duwang personalidad na siyang missing link sa kaso kan mga nawawarang sabungeros.
Binisto ini na sinda Elakim Patidongan asin Jose Patidongan na tugang kan whistleblower sa kaso na si Julie “Dondon” Patidongan.
Naenot nang sinabi ni Patidongan na duwa sa personalidad an bisto niya na imbuelto sa kaso alagad dai niya ini papangaranan.
Ipinaliwanag man ni PNP Spokesperson Police Brigader General Jean Fajardo na nadakop an mg apersonalidad sa sarong nacion sa Southeast Asia makalihis maggamit nin alyas sa saindang mga pasaporte.
Ikinasa man kan Criminal Investigation and Detection Group (CIDG) an operasyon matapos maaraman an lokasyon kan duwang personalidad ngani maibalik sa Pilipinas.
Dugang pa ni Fajardo na si Elakim suboot an nag-withdraw sa ATM account na sadiri kan saro sa mga sabungero asin si Jose man an nahiling sa sarong video na nagin escort sa pag-kidnap sa mga sabungero.
Nanindugan si Fajardo na lehitimo an saindang isinagibong operasyon asin igwang warrant of arrest an magtugang.
Kinakaipuhan man suboot sinda i-discharge bilang state witness asin sasangatan nin kaso huli sa partisipasyon ninda sa kritikal na kaso.
Mientrastanto, huli man sa pagkaka-arestar kan duwa, kumpiyansa asin nagtutubod an polisya na matatawan na nin linaw an kaso kan mga nawawarang sabungero.
