LEGAZPI CITY — Padagos pang pig-oobserbaran ngonian sa ospital an kamugtakan kan duwang personang kritikal an sitwasyon makalihis na maimbwelto sa banggaan kan duwang motorsiklo sa Purok 6 Brgy. Pawa, Manito Albay.
Imbwelto sa pangyayari an motorsiklong pigmamanehar ni Salvador Defeo, 63 kaibanan an backride na paratukdo na binistong si Lara Dawal, 23 mantang lunad man kan motorsiklo ni Gilbert Salcedo, 27 an mga pasaherong sinda Charlie Lana, 19; Grace Salcedo, 18 asin Sarah Datur, 20.
Nagluluwas sa inisyal na imbestigasyon kan Manito Municipal Police na parehong dalan an pigbabaybay kan mga behikulo na hale sa Brgy. Hologan pasiring sa Poblacion kan mangyari an aksidente.
Anas nagsapar nin injury an mga nasabing persona na tulos man na idinalagan sa ospital mantang seryosong lugad an nakua kan backride na paratukdo asin ni Datur.
Sa presente, nagtetenir na sa kustodiya kan nakakasakop na hepatura kan pulis an mga imbweltong behikulo para sa magkakanigong disposisyon.
Pig-aaram naman kun siisay an dapat na manimbag sa nangyari.
