LEGAZPI CITY- Nakatalaan nang ibiyahe an sarong 2-anyos na aking babayi pasiring sa Los Baños, Laguna tangarig na liwat na makaibanan an totoong pamilya, makalihis na mahanap kan mga otoridad sa laog kan 11 dias nang pagkawara.
Sa intrevista kan Bombo Radyo Legazpi ki P/Supt. El Cid Roldan, hepe kan Ligao City PNP, enot na ipigreport an aking nabisto sa pangarang “Zia” na nawawara kan mismong lolo kaini kan Pebrero 17.
Napag-araman sa pakikipagkoordinar kan Los Baños PNP sa police unit sa Albay na dinara suboot kan kapitbahay kan maglolo na si Evelyn Corcuera, 41-anyos alyas “Lovely” an nasabing aki sa paisi na mabisita sana sa ina kan biktima na nakakarsel huli sa kasong may kinaaraman sa iligal na droga.
Alagad nagkapirang aldaw na suboot an nakakaagi kan dae na ibinalik ni Lovely an aki kaya nagdesisyon an lolo na magpatabang na sa pulisya.
Digdi na napag-araman na dinara ni alyas Lovely an aki sa live-in partner na si Ruel Quian, 25-anyos tangarig na ipabistong aki nindang duwa asin dae madagos an nakatalaan kutang pakikipagsuwayan kan lalaki.
Nag-uli pa suboot an mga ini sa Bicol kun sain nasundan kan mga otoridad sa ciudad kan Ligao asin duman dinakop.
Mientras tanto, preparado suboot si Lovely na kahampangon an kasong posibleng isunad kan pamilya kan biktima kontra digdi mantang padagos man an pagnigar kan lalaki na daeng kinaaraman sa nangyari.
