LEGAZPI CITY- Naging matrayumpo asin matoninong an pigsagibong primerong trade fair kan Local Economic Development and Investment Promotion Office o Ledipo Albay na ginibo kasuudma sa Albay Astrodome.
Ini an one day event na pigpartisiparan kan mga local entrepreneurship kun saen pigshowcase ninda an saindang mga manlaen laen na produkto.
Segun kay LEDIPO head Jaymee Florence Ribaya sa intrevista kan Bombo Radyo Legazpi, dakol na mga negosyante an mga first time na nagbale sa nasambitang trade fair kun saen pinahiling an saindang mga produkto.
Segun pa sa saiya, na sarong magayon man na bareta an pagbukas kan Pantao Port sa Libon Albay huli ta mas bukas na ini sa mga paglaog asin pagluwas kan mga produkto sa probinsya.
Piglinaw man kan opisyal na bako lang mga pasyaran an pigduduman kan mga turista kundi magin an mga produkto na pwede man nindang manamitan sa Probinsya kan Albay.
Mientrastanto, naka full support man an Local Economic Development and Investment Promotion Office sa mga micro small and medium enterprise ngane na mas mabisto sinda,asin maaraman man kan gabos kun ano an mga produkto asin serbisyo na abilable na para sa gabos, asin maboost lalo an pagpapalakop sa mga negosyo na nagiging matrayumpo sa Probinsya kan Albay ngane na maprove na magayon magnegosyo asin mag invest sa nasabing Probinsya.
