LEGAZPI CITY-Nadukayan kan mga otoridad an sarong 18-anyos na lalaki sa Barangay San Antonio Sapa Pilar sa ciudad kan Sorsogon, kung sain kinumpirmar kan mismong kapamilya na igwang pinagaagihan an biktima.
Segun kay Sorsogon Police Provincial Office Spokesperson, Police Major Arwin Destacamento, sa intrevista kan Bombo Radyo Legazpi, kinumpirmar kan mismong magurang kan biktima na igwang pinagaagihan ini mantang nawawara poon pa kan Agosto 10.
Naresibe suboot kan mga otoridad an report mapadapit sa sarong bangkay sa nasambitang barangay huli sa sarong parasisira na nakahiling sa biktima.
Sinabi man kan opisyal na dai ma-determine an kawsa kan pagkagadan kan biktima huli sa kamawotan kan mga magurang na dai na ipagsairarom pa sa pagbusisi dapit sa nasabing insidente.
Sa presente, nasa pamilya na an bangkay kan lalaking biktima.
Dugang pa ni Destacamento na pirmihan na nangyayari sa nasambitang barangay an mga siring kaining insidente kung sain piglalaoman man ninda an mga intervention ngani maibitaran an kaparehong insidente.
Pagirumdom man kan opisyal sa mga mga magurang na tulos tawanan nin pansin asin tutukan an saindang mga aki.
