Duwang katawo an pigkokonsiderang persons of interest kan mga awtoridad katakod sa karumal-dumal na paggadan sa 18-anyos na daragang si Rhona Mae Patricio sa Barangay Old Bulatukan, Makilala, Cotabato.
Segun kay PCMS Ritchie Gesulga, information officer kan Makilala Municipal Police Station, nagluwas an biktima bandang alas-7:30 nin banggi kan Martes, Hunyo 10, nganing maghanap nin signal para sa saiyang cellphone alagad dae na ini nakauli.
Kinaagahan, Hunyo 11, nadukayan an saiyang bangkay sa parte kan creek harani sana sa saindang harong.
Wara na ining saplot sa itaas asin hibabang parte kan hawak, asin nagsapo man ini nin matinding lugad sa payo na siyang posibleng ikinagadan niya.
Sa ibong kan pighahalat pa an opisyal na resulta kan postmortem examination, nagluluwas sa paenot na imbestigasyon na posibleng ginahasa muna an daragita bago ini ginadan.
Kinumpirmar kan mga pulis na duwang indibidwal an padagos na pig-iimbestigaran makalihis mapag-araman bilang ultimong mga naka-chat o naka-text kan biktima bago ini nadukayang gadan.
Mahigot man na kinondena kan pamilya asin mga kaanak ni Rhona Mae an nangyaring krimen asin nangapodan nin marikas na hustisya.
Pig-enganyar man kan Makilala Police an publiko na makipagtabangan asin magtao nin anumang impormasyon na makakatabang sa marikas na paglutas kan kaso.
