Nakatalaan na umabot sa Pilipinas ngunyan na semana an kabilugan na 15 Overseas Filipino Workers hali sa Lebanon.
Segun sa Department of Migrant Workers na kun warang magiging problema, maabot sa nacion an nasabing mga Overseas Filipino Workers sa Oktobre 3.
Enot ng ipigtalaan kan Setyembre 26 an pagbabalik sa nacion kan nasabing mga obrero alagad nagkaigwa nin delay huli sa suspensyon kan nagkapirang mga flights.
Hali sa labi sa 11,000 OFWs na presenteng nasa Lebanon, labi sa 1,100 an nagpahayag nin interest na makabalik sa nacion kasunod kan kariribukan sa pagultangan kan Israeli Defense Forces asin militanteng Hezbollah.
Puon kan Oktubre 2023 hasta Setyembre, igwa ng 430 Pinoy an nakabalik na sa Pilipinas.
Lambang saro sainda an nakaresibe nin tig-P75,000 pag-abot sa Pilipinas.
