LEGAZPI CITY-Pormal nang sinangatan kan National Police Commission (Napolcom) an mga kasong administratibo laban sa 12 aktibong pulis na imbuelto sa pagkakawara kan mga sabungero.
Kairiba sa mga kaso an grave misconduct, irregular performance of duty, asin conduct unbecoming of a police officer.
Magigirumduman na an whistleblower na si Julie “Dondon” Patidongan an nagsangat nin reklamo sa Napolcom, kairiba an mga pamilya kan mga biktima.
Segun sa pahayag kan testigo, an mga pulis binayadan sa pagkidnap asin paggadan kan mga sabungero, asin itinapok an mga bangkay sa Taal Lake.
Katakod kaini, igwang mga tulang na narekober sa irarom kan lawa, asin sa presente isinasairarom sa forensic examination ngani masierto kung ini an mga nawawarang sabungero.
An Napolcom, nagtao na man nin 5 aldaw sa mga pulis para sa saindang counter-affidavit.
Sinasabing may mga alegasyon an pagprobar na impluwensyahan an imbestigasyon, kairiba an pagrani kan pirang personalidad sa sabong industry sa opisyal kan Napolcom ngani makiaram sa kaso.
Alagad segun kay Interior Secretary Jonvic Remulla, warang “sacred cow” sa imbestigasyon, maski mayor, gobernador, o senador, pwedisir makasuhan kung igwang bastanteng ebidensya laban sa mga ini.
