Nahiling na kan Bureau of Customs an gabos na 12 mga luxury vehicles na nakalista sa saindang search warrant sa St. Gerard construction company sa ciudad kan Pasig.
Sinabi ni Customs Commissioner Ariel Nepomuceno na kan banggi nin Martes, Setyembre 2 na an mga behikulo an isinuko asin presenteng nakaparada na sa compound kan St. Gerard Construction General Contractor and Development Corp’s sa Pasig City.
Kinababalehan ini kan mga behikulo na Rolls Royce Cullinan 2023, Bentley Bentayga, Mercedes Benz G-Class (Brabus G-Wagon), Mercedes AMG G 63 SUV 2022, Toyota Tundra 2022, Toyota Sequoia, asin Cadillac Escalade ESV 2021.
Mantang an tulong behikulo na Mercedes Benz G 500 SUV 2019, GMC Yukon Denali SUV 2022 (Gas), asin Lincoln Navigator L 2024 an nasa authorized service centers huli ta ini an pigpapakarhay.
Gabos suboot na mga behikulo an sinelyuhan asin ini an pigbabantayan kan mga personahes kan Bureau of Customs mantang saindang pighihiling kun igwa bang pagbayolar an kagsadiri arug kan dae pagbabayad nin bastanteng mga buwis asin pirang mga dokumento sa mga imported na mga luxury cars.
Magigirumdumang nakakuwa nin search warrant an BOC sa korte para sa berepikasyon kan 12 behikulo an tulos nindang pigduman an harong na kagsadiri ni Sara Discaya alagad kan aga nin Setyembre 2 an igwang duwa sana an nahiling nindang nakaparada sa harong na nakalista sa warrant.
Huli digdi an pinatanidan kan BOC si Discaya na mahahampang ini sa reklamo enkasong dae mailuwas an mga behikulo na nakalista sa saindang search.
Pinasalamatan kan BOC an tulong kan pirang ahensya arug kan Department of Transportation (DOTr) – Land Transportation Office (LTO), Philippine National Police (PNP) – Eastern Police District (EPD), Highway Patrol Group (HPG), Philippine Coast Guard (PCG), asin mga barangay officials kan Bambang, Pasig City.
