LEGAZPI CITY – Nasa 11 miembro kan rebeldeng New People’s Army (NPA) an nagsurendir sa kapulisan sa Masbate.
Napag-araman na anas lalaki an mga ini na residente kan Brgy. Igang sa Masbate City asin pigsasabing regular na miyembro kan Larangan Guerilla North Masbate sa Jose Rapsing Command na nago-operate sa island province.
Kaibanan na ipigsurendir kan mga ini an duwang caliber 357 revolvers asin sarong caliber 38 revolver.
Ipighayag ni Police Regional Office 5 (PRO5) information officer PMaj. Maria Luisa Calubaquib sa intrevista kan Bombo Radyo Legazpi, resulta ini kan pakikipag-coordinar kan mga otoridad sa nagdadakol na numero kan mga nagpapaabot nin “surrender feelers”.
Susog sa istorya kan mga rebelde, napagdesisyunan suboot kan mga ining magbaba na asin magbalik-loob sa gobierno para sa “peace of mind” asin sa seguridad kan pamilya.
Kasuodma kan isagibo sa Masbate 1st Provincial Mobile Force Command Headquarters sa Camp Bonny Serrano an seremonya kan pagsurendir kan mga ini.
Sa presente, nagtetenir an mga ini sa halfway house sa kustodiya kan Masbate Police Provincial Office mantang ipigpo-proseso an nakatagamang magkakanigong benepisyo.
