LEGAZPI CITY—Naibarewas na kan Albay Provincial Social Welfare and Development Office bago pa man an Kapaskuhan an cash incentives para sa walong centenarian o mga indibidwal na nag-abot na sa 100 an edad sa provincia.
Segun ki Albay PSWDO Head, Ma. Vivien Cea, sa intrevista kan Bombo Radyo Legazpi, posible man na madugangan an numero kan mga centenarian sa provincia huli sa may presente pa sindang ipigproseso na maselebrar kan saindang ika-100 na kumpleanyo ngunyan na bulan kan Disyembre.
Pighayag man kaini na mas dakol suboot an saindang nairehistrong centenarian kumpara kan mga nakalihis na taon huli sa uminabot na ini sa labi 30 maski dae pa natatapos an taong 2025.
Tinawan-doon man ni Cea na sainda man giraray na itatao an insentibo sa pamilya kan sarong centenarian maski namaaram na ini durante kan pagproseso kan saindang mga dokumentos.
Mientrastanto, gikan an nasambitang insentibo sa gobierno provincial kan Albay asin Department of Social Welfare and Development sa irarom kan pondo kan gobierno nasyunal.
