Sarong katawo na an binawian nin buhay mantang 200 na iba pa an nalugadan sa maribok na hiro protesta sa Kenya.
Nariribok ngunyan an bilog na nasyun kan Kenya makalihis na ianunsyo ni Kenyan President William Ruto an planong pagpapalangkaw nin buwis sa mga barakalon ngani na makatipon nin pondo.
Ini an naisip na solusyon kan gobyerno ngani na mapugolan an lalong naglalangkaw na utang kan nasyun asin maibitaran an pagkaubos nin pondo.
Alagad dae ini nauyonan kan mga residentes na nagpuon na magtipun-tipon sa matatawong lugar asin naglunsar nin mga protesta.
Nagresponde man sa lugar an mga pulis na naggamit pa nin tear gas asin pigsasabing nagpaputok nin badil, rason kung nata nagkaigwa nin casualty.
Nasa 100 na katawo man an naireport na naarestar huli sa pangungulog sa mga pulis.
