LEGAZPI CITY-Ipigbuyagyag ni dating Ako Bicol party-list Representative Zaldy Co na kairiba si President Ferdinand “Bongbong” Marcos Jr, dating House Speaker Martin Romualdez, asin nagkapirang myembro kan gabinete sa suboot P100 billion “insertions” sa national budget.
Ipighayag ni Co na nagpoon ini kan apudan siya ni Budget Secretary Amenah Pangandaman sa BICAM process taong 2024 kun sain may intruksyon suboot an Presidente na maglaag nin 100 billion insertions sa mga proyekto.
Sinabi pa kan dating kongresista na tulos niyang inapudan si dating Speaker Martin Romualdez asin pigreport an intruksyon kan Presidente alagad sinabi kaini na nakukuwa kan Presidente an mga mawot kaining makuwa.
Nakatalaan suboot siya magbalik matapos an saiyang check up poon kan Hulyo 19 alagad ginamit suboot siyang pang-ulang sa pigasasagibong kurapsyon sa nacion.
Marurumduman na nagkalat sa social media an video na ipinaluwas kan dating kongresista asin nilinaw man niya na haloy suboot siyang nagin toninong huli sa pigsugo suboot siya ni Romualdez na dai na magbalik pa sa nacion.
