LEGAZPI CITY-Pigdeklarar na kan Sandiganbayan Fifth Division bilang “fugitives from justice” si dating Ako Bicol Party-list Representative Zaldy Co asin 3 miembros kan Board of Directors kan Sunwest Incorporated huli sa dai pag-atubang sa kaso nin graft asin malversation.
Kasabay kaini, ipinagboot kan korte an tulos na pagkanselar kan saindang mga pasaporte ngani dai sinda makadulag pasiring sa ibang nasyon.
An kaso may relasyon sa suboot mga anomalya sa P289.5-million na flood control project sa Naujan, Oriental Mindoro na pig-iimbestigaran sa irarom kan anti-graft law.
Marurumduman na kan Nobyembre 2025, an mga mandamiento de aresto ipinaluwas laban ki Co asin iba pang mga opisyal kan DPWH Mimaropa asin Sunwest Inc. huli sa mga iregularidad sa mga proyekto.
Susog sa Bureau of Immigration, an nagkapira sa mga akusado yaon sa luwas kan nasyon poon kan magputok an nasabing eskandalo.
An Sunwest Inc. sarong midbid na kontratista sa rehiyon kan Bicol na nakasierto nin mga major projects hale sa gobierno, alagad naimbuelto sa kontrobersiya huli sa suboot salang pag-implementar kan sarong flood control project.
Pigduon kan Sandiganbayan na malinaw na indikasyon kan pagdulag sa hustisya an dai pag-atubang kan mga akusado, kun kaya opisyal na sindang inaapod bilang mga pugante.
