LEGAZPI CITY – Dae na ikinakigkig kan grupo nin mga paratukdo an inanunsiyar kan Malacañang na mareresibi na kan mga kawani kan gobyerno an saindang year-end bonus asin P5,000 cash gift ngonian na bulan.
Segun ki Teachers Dignity Coalition Chairman Benjo Basas sa intrevista kan Bombo Radyo Legazpi na bako na ini bago huli ta kun pagbabasehan an ley an dapat pagsapit kan Nobyembre 15 an pwedesir nang maresibi ninda an nasabing benipisyo.
Alagad kun siya an hahaputon, an mga mid-year asin year end bonus an nakabase sa saindang regular salary asin iba suboot ini sa saindang pangapodan na pagdudugang nin monthly salary kan mga paratukdo.
Nagtutubod siya na kun mahalangkaw an sahod kan mga paratukdo an makakasabay ini sa mga naghaharalangkawan na presyo kan babarakalon asin iba pang pigka-kaltas sa sainda.
Pigtaram pa kan opisyal na gabos na mga permanente nang paratukdo asin mga nagseserbisyo pa sagkod sa Nobyembre 30 an kabale pa sa makakresibi kan mga nasambitang bonus.
Makakatabang man suboot an mga nasabing benipisyo sa mga paratukdo asin iba pang kawani kan gobierno na nadanyaran kan pangrarapado ni Bagyong Tino partikular na sa provincia kan Cebu.
Mientrastanto, nakikidumamay man si Basas sa mga pamilya kan mga nagadan huli sa nasambitang bagyo.
