LEGAZPI CITY – Tawanan nin paagi tangarig na maeksperyensyahan kan mga estudyante kan senior high school an magtrabaho sa field o kumpanya na base sa pigkukuha nindang educational track.
Ini an mayor na rason sa pagsasangat ni Bokal Allan Rañola kan resolusyon na pighahagad an pakikipagkoordinar kan mga local chief executives sa provincia kan Albay na engganyaron an mga pribadong kompanya asin iba pang organisasyon na magin partner sa sa isasagibong work immersion kan mga estudyante.
Nagtutubod kaya an opisyal na kinakaipuhan na ma-expose sa tunay na trabaho an mga ini tangarig na masabing ‘equipped with essential competencies’.
Pansuporta man suboot an nasambit na lakdang sa nakakaag sa Republic Act 10533 o an Enhanced Basic Education Act na pighahagad an 80 hrs na work immersion.
Mientras tanto, inomaw man ni Bokal Job Belen an nasambit na resolusyon alagad ipigsuhestir an pagkakaigwa nin paagi tangarig na makampante an mga magurang urog na sa posibilidad kan mga babayadan na fees sa mga aatendiran na kompanya dawa pa an mga ini an matrabaho.
Inabisuhan man ni Ziga an proponent kan resolusyon na i-check an eksistidong labor laws tangarig warang mabayolar na probisyon urog na sa pag-employ sa mga menor de edad.
