Nakatalaang bumisita sa Pilipinas sa maabot na Marso an WNBA champion asin miyembro kan USA national team na si Sabrina Ionescu.
Mapoon an saiyang 3 country Asian tour sa Manila, kun saen iheheras niya an saiyang kaaraman asin eksperyensya sa mga masunod na henerasyon kan parakawat.
Sa Marso 10, makikibale si Ionescu sa sarong panel talk kaiba an kapwa mga atleta asin coach kan sarong brand sa BGC, Taguig.
Sa Marso 11, sasabak siya sa sarong exhibition game asin three-point shootout challenge sa Smart Araneta Coliseum.
Pagkatapos kan saiyang pagbisita sa Pilipinas, mapasiring siya sa Guangzhou, China para sa sarong basketball camp, asin tatapuson an saiyang tour sa Hong Kong.
Segun kay Ionescu, excited siyang makipag-olay sa mga basketball fans sa Asya, lalo na sa mga joven na parakawat, asin naglalaom siyang makakapagtao siya nin inspirasyon sa lambang saro nganing maabot an saindang mga pangarap sa paagi kan dedikasyon asin pagsusumikap.
