Nagpaluwas nin report an World Health Organization (WHO) dapit sa naglalalang sitwasyon sa Middle East asin parte kan Europa katakod kan padagos na tensyon asin labanan sa rehiyon.
Segun sa WHO, an mga mayor na huma sa salud kabali an trauma, danyos, asin kapansanan; kawaran nin padagos na access sa mga serbisyong medikal para sa mga nag-ebakwar; asin an posibilidad na maglakop an helang sa mga evacuation shelter.
Sinambit man kan WHO an peligro gikan sa mga pag-atake sa mga desalination plants na nakakabawas kan suplay nin malinig na tubig, siring man an posibilidad nin chemical, biological, radiological o nuclear incident na may magabat na epekto sa salud.
Kabali man sa mga huma an mga heat-related illnesses, mental health distress, asin respiratory diseases.
Afuera sa tulos na epekto, an mga pag-atake sa mga oil storage facilities asin mga refinery sa Iran, Bahrain, asin Saudi Arabia an nagpapalataw man nin mga kahaditan na pwedesir magpalala kan polusyon sa paros asin magkawsa nin kakulangan sa suplay nin enerhiya.
An mga pag-atake sa mga health facilities an nagresulta na sa pagkagadan kan nagkapirang mga health workers, na nagbawas kan access sa mga serbisyong medikal.
Dugang pa digdi, an mga pagkadisturbo sa mga supply chains, paglangkaw kan transportasyon, asin an mga presyo nin enerhiya na nagbabago-bago an nagigin rason nin limitadong access sa mga importanteng bulong asin suplay.
Sa tahaw kan krisis, inasegurar kan WHO na padagos an pagsimbag sa mga kahagadan kan mga health authorities sa paagi nin pagtao nin training, medical supplies, pagpahiwas kan disease surveillance systems, asin pakikoordinar sa iba pang health partners.
Sa pakikipagtabangan sa United Nations asin iba pang mga organisasyon, nagsasagibo man an WHO nin mga alternatibong ruta asin supply hubs nganing maseguro na an tabang medikal an nakakaabot sa mga lugar na pinakanangangaipo.
An report na ini an nagpapahiling kan hiwas kan epekto kan iriwal sa Gitnang Silangan, bako sana sa seguridad kundi orog na sa salud kan mga namamanwaan sa rehiyon asin sa bilog na kinaban.
 has released a report on the deteriorating situation in the Middle East and parts of Europe amid ongoing tensions and fighting in the region.){kind=link}