LEGAZPI CITY—Nagsagawa ng pagsilbi ng warrant of arrest ang mga awtoridad sa Gladiator Cockpit Arena sa Barangay Pantao, Libon, Albay kung saan maaaring nagtatago si Charlie “Atong” Ang.
Ayon kay Libon Municipal Police Station Chief of Police Police Major Roberto Flores Jr., sa panayam sa Bombo Radyo Legazpi, ang nasabing sabungan na pagmamay-ari ni Paulino Fernandez ay umano’y ginamit ni Ang para sa online sabong nitong mga nakaraang taon.
Sinabi ng opisyal na ang warrant of arrest na kanilang inihain ay katulad ng mga naunang inihain kay Ang ng National Bureau of Investigation kaugnay ng kidnapping with serious illegal detention; gayunpaman, ang warrant na inihain ng Criminal Investigation and Detection Group at ng kanilang opisina ay nagdagdag ng isang kaso ng kidnapping with homicide.
Aniya, naabutan lamang nila ang caretaker sa kanilang isinagawang operasyon ngunit nabigo silang matagpuan si Ang sa lugar.
Samantala, patuloy na nananawagan ang kanilang tanggapan sa publiko na agad na makipag-ugnayan sa kanila kung sakaling may anumang impormasyon tungkol sa kinaroroonan ni Atong Ang.
