Warang nai-report na Pilipinong naapektaran sa magnitude 7.7 na linog na nagtama sa sirangang parte kan Indonesia kan Sabado, segun sa Philippine Embassy sa Jakarta.
Sa sarong advisory, sinabi kan embahada na padagos kaining igkokontak an iba pang miyembro kan Filipino community sa mga apektadong lugar asin nakahanda na magtao nin kinakaipuhang tabang.
Dae mababa sa 38 katawo an binawian nin buhay asin duwa an malubhang nairido sa linog.
Nagkawsa man ini nin tsunami waves na wara pang sarong metro an langkaw.
Mientrastanto, padagos an search and rescue operations sa mga lugar na naapektaran kan linog, mantang an ibang tinampo an dae maagihan huli sa landslides asin may mga residenteng nagtitinir na na-trap sa mga nagabang edificio.
