LEGAZPI CITY- Kumpiyansa an National Food Authority (NFA) Bicol na daeng magkakaigwa nin kakulangan sa suplay nin NFA rice sa mga retail outlets asin merkado sa Bicol.
Ini an sa ibong kan pagkadelay kan pag-unload kan nasa 177, 000 rice bags sa barkong nasa Tabaco City Port kan Albay na nagsasairarom ngonian sa fumigation process huli sa nadiskubreng red rust beetles o peste sa bagas.
Pag-eksplikar ni NFA Bicol Asst. Regional Director Yolanda Navarro sa intrevista kan Bombo Radyo Legazpi, ikapitong aldaw na ngonian kan 12-day fumigation process sa paggadan sa mga peste na pinunan kan Agosto 19 asin piglalaomang matatapos na sa Agosto 30 mantang Agosto 31 man liwat na ipagpapadagos an unloading.
Segun pa ki Navarro na igwa pang natatadang bagas an anom na NFA provincial offices na hale sa 200, 000 bags kan bagas na idinistribuer kan nakaaging Hunyo na kaya pang magtagal nin hasta sa 16 na aldaw.
Inasegurar man kaini na en kasong masierto na wara nang problema, dagos-dagos naman an magigin unloading kan mga bagas.
Sa ibong kaini, aminado si Navarro na igwang impluwensiya sa presyo kan commercial rice na nasa P41 hasta P42 an pinakahibaba, an liwat na pagbabalik kan NFA sa merkado urog na mahal man an bakal kan mga negosyante kan nasabing klase nin bagas sa traders na pigkukuhaan.
