Walong tawo an binawian nin buhay makalihis an aksidente sa national highway sa Barangay San Pedro San Pablo, Aurora, Isabela kasubagong alas 2:45 nin maagahon.
Kabali sa mga idineklarar na dead on arrival sa ospital iyo sinda Oseas Calderon Danguilan, Niches Heizle Cagayongan, Claribel Maling, asin Jing Romboa, pararehong nasa legal na edad asin gabos residente kan Barangay Turod Bulo, Tabuk City, Kalinga, mantang pig-aaram pa an pagkakabisto kan apat na iba pa.
Basado sa inisyal na imbestigasyon kan pulisya, sarong six-wheeler truck an nagbabayahe sa nasambitan ng tinampo pasiring sa timog na direksyon kan bigla ining magbalyo sa ibong na linya kan tinampo.
An trak na pigmamaneho ni October de Leon, residente kan Brgy. San Antonio Minit, Echague, Isabela nakabangga sa walang parte kan sarong Toyota Hi Ace na pigmamaneho ni Ron Ron Onalan, residente kan Brgy. Danao, Lacnog, Tabuk City.
Huli kaini, saro pang Hi Ace Van an nakabangga sa likodan kan enot na Hi Ace Van.
Nagresulta ini sa pagkairido kan mga pasahero kan enot na van na dinara sa pinakaharaning ospital sa lugar.
Alagad, ideneklarang dead on arrival an driver kan nasambitan ng van asin an pitong pasahero kaini kan nag-asikasong doktor.
Segun ki PCapt. Tomas, human error an saro sa mga pigkokonsiderar na rason kan insidente.
Sa ngunian, nagtitinir na sa kostudiya kan Aurora Police Station an truck para sa magkakanigong imbestigasyon asin disposisyon.
