LEGAZPI CITY — (Update) Walo sa mga nabiktima kan mga nagpabistong opisyal kan Mindanao Alliance Composite Command-Bangsamoro Armed Forces-Moro National Liberation Front (MACC-BAF-MNLF) Highlander na nakabase suboot sa Bukidnon an nagtao na kan kompletong affidavit na rekisito sa pagsasangat nin kaso sa mga ini.
Enot nang binisto an mga suspetsado na sinda Ernesto Garcia, 63 anyos na napag-araman na retiradong Deputy Director kan Civil Service Commission-Masbate, Joseph Operario, 45-anyos mientras na kaibanan man si Leopoldo Artezuela, 39-anyos na taga-Cawayan, Masbate na nadakop sa operasyon kan Masbate City Police.
Sa ekslusibong intrevista kan Bombo Radyo Legazpi ki PC/Insp. Gerardo Balatucan, hepe kan Masbate City PNP, napag-araman na kan sarong bulan pa ninda pigmomonitor an hiro kan mga ini huli naman sa nakaabot na impormasyon kan panghahagad kaini nin tig-P750 suboot sa pagproseso kan mga ma-apply.
Dugang pa kan opisyal na nadara man sana sa mga promesa kan mga suspetsado an mga biktima kaya nagtugot.
Makusog man an pagtubod kan opisyal na ‘hoax organization’ an nasabing grupo kun saen nagpabisto an lider kan mga ini na suboot igwang ranggong Lt. General mientras na Colonel asin Major man an duwa pa.
