LEGAZPI CITY-Nanindugan si Vice President Sara Duterte na an mga panibagong kaso nin plunder asin iba pa laban saiya asin sa saiyang opisina na isinangat sa Office of the Ombudsman, saro sanang ‘fishing expedition’ ngani matahoban suboot an mga nagpapadagos na imbestigasyon.
Sa sarong pahayag, pigbuyagyag ni Vice President Sara na piglulunsar ninda ini ngonian ngani gamiton an anuman na akusasyon na saindang magigibo sa paglihis kan presenteng isyu nin korapsyon sa nacion.
Pigenganyar man niya an publiko na magin kritikal asin dae tulos magpadaog sa mga pakaraot na suboot pigtatapok sa saiya.
Dugang pa niya na bako na ini manungod sa paghanap kan katotoohan asin saro sanang pagmanihar sa isyu kan kurapsyon kun sain pigduon pa niya na sagkod ngonian wara pang napapanimbag sa irarom kan ley mapadapit sa mga anomalya.
Mientrastanto, marurumduman na isinangat an mga reklamong plunder asin graft kontra kay Vice President Sara asin sa 15 iba pa huli sa suboot salang paggamit kan kantidad na P612.5 million na confidential funds.
