LEGAZPI CITY — Ipigpropuesto kan Commission on Election (Comelec) an pagbabago kan hitsura kan voter’s identification card karibay kan dating laminated na papel.
Sa intrevista kan Bombo Radyo kay Comelec Bicol Regional Election Director Atty. Maria Juana Valeza, nagpapadagos pa an negosasyon o bidding sa national office para sa pagkua nin mga materyales na gagamiton sa paggibo nin ID.
Imbes na papel siring kan dati, riribayan na ini nin PVC ID o plastic ngane na dae madali maraot.
Magkakaigwa man suboot nin pilot testing sa National Capital Region kun ano an magiging resulta kan PVC ID.
Enkaso madagos ini, magbabayad na nin nasa trenta y cinco o kwarenta y cinco pesos para sa voter’s ID kasabay na an voter’s certification.
Ipighayag pa ni Valez na dae man magiging imbalido an mga naenot ng ipinaluwas na ID.
Kaipuhan man suboot na maibariwas na an nasa tres cientos cincuenta y kwatro mil na mga IDs na yaon sa Comelec election office kan kada lugar.
Mientrastanto, naglalaom man si Valeza na madadagos an pirilian ngunyan na taon ngane na dae man suboot masayang an kwarta kan gobyerno asin preparasyon kan Comelec.
