Pupuonan na kan Tri-committee kan Kamara an imbestigasyon sa mga indibidwal na nasa likod kan talamak na pagpapakalat nin fake news na saro suboot na matinding panlalansi sa publiko.
Magsasagibo ngunyan nin executive briefing an joint panel na pigbubuo kan Committees on Public Order, on Public Information, Information and Communications Technology (ICT) na pangengenotan ni Sta. Rosa Rep. Dan Fernandez.
Ipiggiit ni Fernandez na an mga nagpapakalat nin salang impormasyon para sa personal o politikal na interes an dapat na manimbag.
An pangenot na isyu na ididiskotir an transparency kan mga social media platforms sa pagmidbid asin pagtangkas kan salang impormasyon, pagpapaotob nin mga lakdang sa pananagutan laban sa mga paulit-ulit na nagbabalgar siring kan mga iresponsableng vlogger asin influencer, asin an mas mahiwas na epekto kan dis-impormasyon sa pambansang seguridad, lalo na sa huroron nin iwal sa West Philippine Sea.
Kairiba sa mga inimbitahan mga pangenot na social media platforms para ieksplikar an saindang mga polisiya asin lakdang kun pano ninda piglalabanan an fake news, cyberbullying, asin mapangraot na content.
Pigtaram ni Fernandez na mimidbidon man kan imbestigasyon an mga butas sa ley para matugunan an mga isyu.
Nangapudan man ini sa publiko na dae basta magtubod sa mga impormasyon na saindang nahihiling online asin magin mapanuri para maaraman kun peke an mga ini.
Tututukan man kan imbestigasyon sa mga peligro resulta kan fake news sa mga ordinaryong Pilipino, lalo na sa mga kajovenesan asin marginalized na pangenot na biktima kan cyberbullying asin online harassment.
