LEGAZPI CITY—Mas pinahigot kan lokal na gobierno kan Virac, Catanduanes an mga lakdang nganing makalikay sa paglakop pa kan helang na African swine fever (ASF).
Segun ki Virac Assistant Department Head I, Andy Po, sa intrevista kan Bombo Radyo Legazpi, dae na sinda nagtutugot na warang livestock health certificate kun muya na magbuno sa saindang slaughter house.
Nagkundusir na man sinda nin meat establishment control operations kun sain pig-aasigurar na an gabos na karne na pigtangro na ipabakal sa merkado publiko o talipapa an nag-agi sa slaughter house, siring man na igwang maninigo na meat inspection certificate.
Pagdoon kan opisyal na an nasabing lakdang an kasunod kan nairehistrong kaso sa banwaan.
Sa presente, nagnegatibo na man sa mga laboratory test an mga piggery sa saindang lugar.
Katabang ninda sa pagpahigot kan lakdang an kapulisan asin segun saiya na sa ngunyan wara pa man sindang naresibeng report na dae nagsusunod sa nasabing orden.
