LEGAZPI CITY- Ibinida ni Vice Governor Harold Imperial an dakulang katabangan kan Magayon Festival sa pagbilog kan identity kan provincia kan Albay.
Sa naging mensahe kan nasambit na opisyal, kumpiyansa suboot ini na mailalawos ngonian na taon an selebrasyon dawa pa kinaipuhan ining ilipat nin bulan na puon sa nanudan na pagselebrar kada bulan kan Abril an naging Mayo.
Patotoo sana suboot an inapod kaining ‘Mother of all Festivals in Albay’ na nalagpsan an mga political spectrum asin pinagkakaburunyog an mga opisyal sa paglalawos kan makolor na selebrasyon.
Tinawanan-honra man kaini an mga paraoma siring man an mga nagkrear kan masterpiece kan literatura asin iba pang klase nin arte katakod kan selebrasyon.
An Magayon Festival an brainchild kan enot na bes sa pagigin gobernador ni Governor Al Francis Bichara kan 2001 na nagtataong honra sa kagayonan kan Bulkang Mayon siring man kan mga tawong nagpapadagos sa paglaban sa mga agyat kan disaster prone environment.
