Nagkahampangan na an TV host-actor na si Vic Sotto asin director kan kontrobersiyal na pelikulang “The Rapists of Pepsi Paloma” na si Daryll Yap kasuudma sa Muntinlupa Regional Trial Court Branch 205.
Nag-abot sa korte si Yap bandang alas-8 nin aga. Dae nguna ini nagtao nin pahayag sa kaso huli sa dae suboot siya allowed na magtaram dapit digdi.
Pirang oras man an nag-abot si Sotto kaiba an saiyang agom na si Pauleen Luna asin an saiyang abogado alagad dae man nguna ini nagtao nin pahayag kan mahapot ini dapit sa kaso.
Pigdangog an writ of habeas data na pigpetisyon kan kampo ni Sotto. Ini an enot na pagkakataon na parehong present an duwa sa pagdangog sa korte makalihis na magsunad an aktor nin 19 counts nin cyber libel kontra kay Yap.
Magigirumduman na nag-ugat an kaso makalihis na ipaluwas an enot na teaser kan kontrobersiyal na pelikula na hango sa buhay kan nagadan na sikat na aktres kan dekada ’80 na si Pepsi Paloma o Delia Dueñas Smith sa tunay na buhay.
Ipinalabas an teaser video kan Enero 1 sa presenteng taon na tulos na nag-viral makalihis na lantarang maunambitan an pangaran kan TV host bilang suboot nanlugos kay Paloma.
Katakod kaini, hinagad ni Sotto an pagpapaluwas nin writ of habeas data kan Enero 7. Kun sakaling katigan man ini kan korte, susuguon si Yap kan korte na i-take down o kaya naman an itama an nagkapirang porsiyon kan teaser na pigkokwestyon kan kampo ni Sotto.
Mientrastanto, nagtitinir na positibo pa man an director na si Daryll Yap na maipapalabas sa mga sinehan an saiyang pelikula na nakatalaang i-release sa Pebrero.
