LEGAZPI CITY — Nasa “finishing touches” na sana an pamayuhan kan Misibis Bay Resort kun sain isasagibo an paparaning 50th ASEAN Ministerial Meetings sa maabot na Agosto 21-25.
Segun ki Amanda Betito, food and beverage manager kan nasabing resort, ipigsairarom ninda sa training an food service staff ngane matawanan nin magayon na servicio an maabot sa 200 sundo 250 na piglalaomang bisita.
Pigtatapos naman suboot an mga minor repairs and necessary maintenance ngane masierto na preparado asin komportable para sa gabos an saindang resort para sa gabos urog na hale an mga ini sa manlaen-laen na nasyun sa Asya.
Segun pa ki Betito, afuera sa PNP personnel asin iba pang security forces na ipapalakop, nagsairarom man sa training an mga security department asin nailatag na an contingency plans.
Pighahalat naman sana an ipapasubling na mga ambulansya kan Department of Health enkasong may mangyaring dae piglalaoman. Apwera digdi, may in-house doctors asin 24-hour on-duty nurses na kumpleto sa facilidad asin emergency vehicle para sa first-aid treatment.
Ikinaogma man ni Betito an pagkakapili sainda bilang host kan nasabing aktibidad huli sa ini man suboot an first international event na kan Misibis Bay na nataon pa sa saindang ika-10 taong anibersaryo.
Naglalaom man si Betito na matatapos na ngonian na semana an pagpapakarahay sa resort ngane sa masunod na semana, tututukan na sana an dugang pang training sa mga staff na maserbi sa mga bisita.
